Albisteak 2020
BEREZIAK
03 Abu 2020
Emozioz beteriko lau jardunaldi
Oraindik gauza asko daude erabakitzeko Euskotren Ligako azken bi asteburuetan
Espainiako Traineru Txapelketaren ostean, Euskotren Liga Hondarribian eta Ondarroan izango da asteburu honetan, azken lau jardunaldietako bi jokatzeko. Asteburu honetan ekingo zaio berriro lehiari, bi bandera berrirekin: XII. Txingudiko Bandera - Mapfre Sari Nagusia eta Ondarroako III. Bandera - Cikautxo Sari Nagusia.
Bi bandera horiek jokatzeaz gain, puntu baliotsu batzuk ere jarriko dira jokoan, Euskotren Ligako sailkapenean klubek denboraldiko azken zati honetan posizioak igo edo jaisteko aukerak baitituzte oraindik. Une honetan, Orio Arraunketa Elkartea da sailkapen nagusiko liderra 30 punturekin eta aurreko denboraldian lortutako Euskotren Saria berresteko bidean da, baina Donostiarra Lacturalek (2º /24 puntu) ez dizkio gauzak erraz jarriko; izan ere, Donostiako taldea goranzko bidean iritsi da azken hitzordu hauetara, Euskadiko Txapeldunen titulua besapean duela.
Sailkapenaren bigarren zatian Donostia Arraun Lagunak eta Hondarribia Bertako igogailuak ditugu, 15 eta 14 punturekin, hurrenez hurren, eta azken lau jardunaldi hauetan borroka gogorra izango dute, iraileko playoffetara eramango lukeen azken postua saihestu eta Euskotren Ligako talde izaera defendatzeko. Edozein axolagabekeriak lehiaketako lau taldeek zenbait puntu galtzea ekar dezake, uda amaieran bakoitzaren helburuak betetzeko beharrezkoak izan daitezkeenak.
Baina dena ez da banderetako garaipenetan eta Euskotren Ligako sailkapen nagusian laburbiltzen. Azken bi asteburu hauetan erabakiko da, baita ere, nork irabaziko duen emakumezkoen Patroi Onenaren Saria. Une honetan, Donostiarra Lacturaleko Natalia Tubio dago sailkapeneko lehen postuan 15 punturekin, eta puntu bakarra ateratzen dio Orioko Arraunketa Elkarteko Nadeth Agirre egungo txapeldunari. 3 puntura dugu Nerea Perez, Hondarribiako Bertako igogailuak taldekoa, eta laugarren postuan Donostia Arraun Lagunakeko Andrea Astudillo dago, zazpi punturekin.
Asteburu honetan Hondarribian eta Ondarroan lehiatu ondoren, Euskotren Liga Zarauzko jardunaldi bikoitz klasikoarekin amaituko da, aurten Zarauzko XII. Ikurrina jarriko da jokoan eta Euskotren Ligaren hamabigarren edizio honi amaiera emango dio.